Кузанова Роза Елеусінқызы 1946 жылғы 29 қазан күні Астрахань облысында дүниеге келген. 1970 жылы Астрахань мемлекеттік медициналық университетін бітірген. 1975 жылдан 2012 жылға дейін, 37 жыл бойы, Ақтау қаласындағы перинатальдық орталықта бөлім меңгерушісі​болып еңбек етті. Өмірінің соңғы күндеріне дейін​ "Аманат" жеке​медициналық​ клиникасында акушер-гинеколог​ дәрігері қызметінде болып, бар өмірін ана мен бала денсаулығын қорғауға арнады.  Адамгершілігі мол, білікті де білімді дәрігер​ мыңдаған жандарға ана болу бақытын сыйлады, талай сәбидің жарық дүниеге келуіне себепші​ болды. Акушерия-гинекология саласының қыр-сырын толықтай меңгерген, жоғары кәсіби маман дәрігерлік қызметтің бел ортасында жүріп халықтың үлкен​құрметі мен сүйіспеншілігіне ие болды, еңбегі елеусіз қалған жоқ. "Қазақстан Республикасы денсаулық сақтау ісінің үздігі", " Қазақстан Республикасы денсаулық сақтау ісіне қосқан үлесі үшін" төс белгілерінің, көптеген жоғары марапаттардың иегері.​ Іскерлілігімен, біліктілігімен, ұйымдастырушылық қабілетімен,​ адамгершілігімен ерекшеленген жаны жайсаң жанның халық денсаулығы үшін сіңірген еңбегі өте зор.

Үлгілі ана, бақытты әже, саналы ғұмырын ​ өңір медицинасының дамуына арнаған майталман дәрігер Роза Елеусінқызының ​ қазасына байланысты, Облыстық перинатальдық орталығы атынан марқұмның отбасына, туған-туыстарына қайғырып көңіл айтамыз! ​ Артында қалған ұрпағына амандық тілейміз! Асыл​ ​ бейнесі есімізде мәңгі сақталады..