Бұл мереке әлемнің 50-ден астам елінде атап өтіледі. «Акушер» (accoucher) сөзі французша босануға көмектесу деген мағынаны білдіреді. Акушерлер — дәрігердің көмекшісі. Босануға түскеннен перзентханадан шыққанға дейін әйелдің қасында болып, босану кезінде қажет медициналық көмек пен моральдық қолдауды көрсетеді, жаңа туған нәрестелерге күтім жасайды.

Әрбір шаңырақтың шаттығын шалқытып, нәрестенің іңгәсі мен уіліне бөлейтін бүгінгінің кіндік шешелері – Халықаралық акушерлер күнімен барлық осы мамандықтың иелерін құттықтаймыз! Акушерлердің жұмысын бір сөзбен бағалау мүмкін емес. Олар әрбір ана мен баланың өмірі үшін қалтықсыз қызмет етіп, сол жолында өздерінің білімі мен біліктілігін, тәжірибесі мен жігер-күшін, ең бастысы мол мейірімін жұмсайды. Шыр етіп дүниеге келген әрбір шарана – олардың осы қажырлы еңбегінің жемісі. Біз әрбіріміз дүние дидарына келгеніміз үшін әуелі Аллаға, екінші Анамызға, үшінші кіндік шешемізге, ана мен бала өмірінің қорғаушысы – акушерге қарыздармыз.

Құрметті акушерлер, баршаңызды кәсіби мерекемен құттықтап, баға жетпес еңбектеріңіз үшін шексіз алғысымды білдіреміз!. Баланың бақыты мен болашағы, анасының денсаулығы сіздердің жылы және қамқор қолдарыңызға ​ байланысты. Жүректеріңізде әрқашан өз істеріңізге деген сүйіспеншілік пен адалдық өмір сүрсін!

Бүгінгі таңда Маңғыстау облыстық перинатальдық орталығында 90 акушерлер қызмет атқарады. 44 акушердің біліктік категориясы бар.